أجمل قصائد الشاعر عبدالله علوش

اسعد الله اوقاتكم بالخير





أحبتي .. حبيت أطرح عليكم أغلب ,ومارآق لي من قصائـد.. الشاعر عبدالله علوش ..
شاعر غني عن التعريف ..


وهو أخ الشاعر والاديب الرائع سعد علوش .



شاعر فرض نفسه بقوة شعره وجزالة الفاظه ..


صاحب ابيات قصيره ولكن تحمل بين طياتها العديد من القصائد ..


أترككم الآن .. فانا ادعوكم للتمتع بقراءة قصائد هذا المبدع ..


وهي مهداهـ مني الى الاعضــــــــــــــــــــ ـاء عـــــــــامه ...




ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ



{ مفتوح ومسكر }



مفتوح ومسكر مسكر ومفتوح
تشوف رقمي وكن منت بتشوفه



شبعان وشايف خير مانيب مشفوح
واللي يبي شوفي فانا احب شوفه



بتروح قل بروح واقولك روح
ولا على وجه المقفي حسوفه



والا احساسي قد له سنين مجروح
من سيدة كل الزيان العزوفه



اللي لها كل الغلا قاع وسفوح
عند اسمها كل اسم امره واطوفه



صدقي لها ولغيرها لعب ومزوح
والقلب كل اللي يجونه ضيوفه



ضيف لمنه راح تبراله الروح
وضيف لمنه راح جعله ذلوفه



والا انت ياراعي مسكر ومفتوح
مارية الكذاب كثرة حلوفه






ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ


{ طيش النفوس }





الله يغفر لي كبار المساوي
في يوم تجزا كل نفس بعملها



انا بوجهه من جميع البلاوي
وبحماه من طيش النفوس وجهلها



رب لغيره ما تلوق الشكاوي
اللي خلق كل النفوس وكفلها



لافكت ابواب الامل والرجاوي
افتر دولاب الزمان وقفلها



ولانقص ظني ولانيب اراوي
في قدرة اللي لستمالت عدلها



حتى لو ان قلبي شفوق هواوي
وله حاجة يسعالها ما وصلها



ما اخايل الدنيا بعين الشفاوي
السلعه اللي عند اهلها لاهلها



نفسي سموحيه وقلبي غناوي
واللي تروح ويعوضنا الله بدلها



لاصرت فالواقع فقير شقاوي
احلم وخل النفس بالحلم تلها





ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ


{ مي والمستشار }


سجلونى من هواة المستشار
من عقب ما قصر اليوم الطويل
كلمتنى مي و الدنيا نهار
دلهتنى لين صار الوقت ليل
قالت الدنيا تجارب و اختبار
ناجحٍ فيها من الناس القليل
باسألك عن شى صار شلون صار
كذب جيل يصدقه خمسين جيل
قلت هاتي الاسئله يوم استدار
فكري و عزم على بدع الجزيل
قالت أصعب شى قلت الانتظار
لكن أسهل شى هو المستحيل
قالت أكذب شى قلت الافتخار
لكن أصدق شي تاريخ و دليل
قالت أطيب شى قلت الانتصار
لكن أردى شي دمعات الذليل
قالت أكرم شى قلت الاعتذار
لكن أحقر شي نكران الجميل
قالت أذكى شى قلت الاعتبار
لكن أغبى شي تدريس الهبيل
قالت أفضل شى قلت الابتكار
لكن أتفه شي تقليد الاصيل
و انا وياها الين الوقت طار
في الكلام الذرب و الخلق النبيل
عقب قالت ذكر أجيال الصغار
ان ما عكس الجزيل الا الهزيل
و الفضل لله ثم للمستشار
والا بينى و بينها حول ألف ميل




ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ


{ ابن عمـــــــــــــك }


ابن عمك لا زعلك شرّه عليه
يقنعك بالحق و الا تقنعه
انشده وشجاه و الاويش فيه
انشده ولا تقاطعه اسمعه
حتى لو انه المخطي .. ما عليه
مشّها مادامها تمشي معه
و كانك المخطي وهو رايه وجيه
اصمت و لو يوجعك لا توجعه
وكان قصّر وانت عادك ترتجيه
لا تقصر فيه لا جاك انفعه
ساسه الطيب على الطيب يحديه
ياصلك حتى لو انك تقطعه
وان بلاك الله برجال سفيه
روح فـسناعك وخله في سنعه
صد عن وجهه على شان الوجيه
من ضياق الجهل الى عقل السعه





ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ



{ سير القوافل }



لا بدا الصبح يتنفس و النجوم اقفت أوافل
قام لله كل أواب يتضرع بالدعاء



يطلب لنفسه و يدعي للمساكين الغوافل
اذ حباه الله بزود إيمان و أجهش بالبكاء



خر ساجد لله المعبود و أسرف بالنوافل
يوم شاف ان العروبه كذب و القدس ادعاء



أمةٍ ما فازت إلا بالخطابات الحوافل
و التصدع ضمن ذات البين و دموع العزاء



انتصر نبح الكلاب و حد من سير القوافل
و الذكي من قال فعلا و الغبي من قال لا





ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ



{ الا منى }



اسف لكل المعجبات
انا هنا وماني هنا



السابقات مكنسلات
عرفتهن قبل منى



والجايات معطلات
شبيبهن عقب منى



محظوره المكالمات
الا اذا اتصلت منى



ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ


{ سوالف مي }




قالت يا عبدالله ان كانك مصافيني
وانك على قولتك ما والله تنساني



خل اللي بينك و بيني .. بينك و بيني
و لا تعلم به القاصي و لا الداني



و ابي وعد منك انك ما تخليني
و لا تعادل غلاي بواحدٍ ثاني



و ان كانك تحبني صادق و تغليني
لمني اخطيت سامحني علشاني



و انا بمحبتك ما لازم توصيني
من يمك الروح تامرني و تنهاني



كم لي و أنا ادور اللي تعشقه عيني
و كم واحدٍ حاول و مل و تعداني



ماني باخلي ردي النفس يذيني
و لا يشد انتباهي كل من جاني



الا انت ياللي غرامي لك زيمشيني
على طريقك لو انه يضعف ايماني



ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ



{ الشرهه علي }




ودعتني تضحك وانا رحت مقهور
وكل يوم اقول اليوم يصحى ظميرك



ماني على تجديد الاحزان مجبور
بلقى مصيري وانت تلقى مصيرك



كنت الوحيد الي اراعيه بشعور
واليوم لا احبك ولا احب غيرك



انا اللي الشرهه علي وانت مشكور
هذا جزاي وكثر الله خيرك



ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ


{ سندريلا }



انا لأشعال ثورة حب محتاجك


وانا لأخماد نفس الثوره احتاجك


لآلامي لأحلامي


لأوراقي لأقلامي


انالأفراحي احتاجك


لكل احزاني احتاجك


انا حتى وانا مانيب في حاجتك


احتاجك


اسافر من بلد لبلاد


بعيد وبين ناس ابعاد


محد يعرف شفكر فيه


ومحد يعرف وجودي او غيابي ليه


تضايقني ابتسامات الضيافه بس لأني ضيف


وتحزني حرارات الوداع المشبعه تزييف


يقدرني ويكبرني ويحظني لأني ضيف


انا بالنسبه له زائر وهو مسؤل فالتشريف


ولا يدري وجودي ليه


ولا يدري غيابي ليه


ولا يدري اني محتاجك


احبك واعتذر لو كان حبي


سبّب ازعاجك


ولكن ما قدرت انساك


ولا يسعدني احراجك


ومحتاجك من اول يوم شفتك فيه


لين اليوم محتاجك


وعن اذنك انا مسافر


بلد ثاني افتش فيه


واكيد اني ابلقى موظف التشريف


يجاملني لأني ضيف


لايدري وجودي ليه


ولايدري غيابي ليه


ولا يدري انا شمحتاج


انا بالفعل محتاجك



ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ



{ البسطاء ,, باللغة العربيه الفصحى }




من انتم لولا البسطاء ؟


الحرب ضحاياها البسطاء


والجوع ضحاياه البسطاء


والحب ضحاياه البسطاء


والتاج ضحاياه البسطاء


من انتم لولا البسطاء؟


كان رسول الله بسيطا


وزعيما فوق الزعماء


من انتم لولا البسطاء ؟


من حارب ضد الشيطان ؟


او من حارب للشيطان ؟


وكلا الطرفين البسطاء


نحن الشعراء الادباء


نحن العلماء العضماء


نحن الاصوات الرنانه


بالحب ونحن الاصداء


من انتم لولا البسطاء؟


نحن الارض ونحن الحرث


ونحن الزرع ونحن الماء


من انتم لولا البسطاء؟


حفنة اسماء جوفاء


اعباء تنجب اعباء


اشياء تخلف اشياء


وغباء في ظل غباء


نحن التاريخ فمن انتم ؟


نحن الناس


ياازياء


فاحترموناياعبادالمال


واشباه النبلاء




ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ


{ فعايل منى }




صحيح ان ضيعة القلب التماني
ونقض الحلم الاول حلم ثاني



رعاك الله ياعصر السلامه
قبل لاعرف مزعلة الغواني



انا قبل اعرفهاكنت داله
مثل خلق الله اللي في زماني



طبيعتها طبيعة كل زينه
تغرياف وكبر واغنجاني



سوالفها تعيفني السوالف
وضحكتها تنسيني الاغاني



الى منها طرت لي قمت واقف
على طولي ولو محد دعاني



اسوي لطيفها العابر قصيده
وذكراها تلهمني المعاني



سقتني الصبر مسموم وشربته
ودانيته وانا مانيب اداني



وصبرت ارجي وفاها واحتريها
وهي الله بلاها بمتحاني



ولكني على عهد المحبه
ولو منها دهاني مادهاني



لها وجهي وستر الله وامانه
فلا بوصوفها ينطق لساني



شلون احفظ هواها واحترمها
ورويها الفلاني والفلاني



زوي قلبي عليها زوي حبل
مقطعته عتيقات السواني



حماني حبها من الحب كله
زهدة بغيرها والله هداني



واذا جادة علي بوصل ساعه
فيفداها عقبها من جفاني



لحد يظحك على الحب لني
ظحكت ابهم واشوف الله بلاني



بليت بحب من لاتعترف به
وتظحك بالهوى مثل اظحكاني




ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ



{ أوهام }



اللي يقول الحب موجود كذاب
حاجات ممنوعه يسمونها حب



واللي يقول اسهرني العشق نصاب
ويعرف نصابه معلمته النصب



ماشافات عيوني مواليف واحباب
والعشق لا خطى بقلبي ولا دب



اكتب غزل كذا علشان لعجاب
ماهو علشان الهوى كل ما هب



لا هب نسناس الهوى خاطري ذاب
ولا خلص النسناس وشلون ؟ بشتب ؟



اوهام شعار وتخاريف كتاب
والجيل ذا مو جاو الهوى خرب



نهيت قلبي من طبوعه ولا تاب
قد قلت له خل الصراحه على جنب



لن الصراحه دايما تفتح ابواب
صار الكلام الواقعي يشبه السب



اللي يبي يزعل بيلقى له اسباب
لو ان مالي ذنب بيحط لي ذنب



حنا بزمن فيه العلاقات بحساب
للخافيه ريبه وللواضحه رب



حب اهلك حب وطنك حب الاصحاب
ذولا لقت تحبهم فعلا تحب



ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ


{ بالمقلوب }



بدون مقدمات واللي مو عاجبه لا يزعل من وجهة نظر



ياللي تميز ويش رايك من قبيل الانفلات
نتداول الصدق اللي ماتلقون احد يتداوله



مدري متى يصح الصحيح الله يغربل ذالحياة
تقول ذالدنيا مع حثال العرب متقاوله



اللي كفو ماهو كفو والغافلات الخاملات
يجي ولدها وكل شي نزاوله بيزاوله



شمس النهار النجم تسبح تحته الكويكبات
ماهوب في حاجة عطارد يسعفه ويناوله



واقرب مثل على انتكاس الوضع بعض الامسيات
شاعر ومستشعر ومبدع كلهم في طاوله



كم مهرجان وامسياته كلها متلخبطات
تطاولوا على الكبار الشله المتطاوله



ترتيبها بالعكس مدري شلون جابوها وجات
تحاول اللجنه بشي وماتعرف تحاوله



ناهيك عن اقحام ((بعض النسوه)) المستشعرات
لاهداف دونيه يقهويها وهي تفاوله



مرضي البشر كايد ولكن تستمر محاولات
سدد وقارب والفشل سمه خلل في محاوله



ملاحظه ومافيه شي الا عليه ملاحظات
اللي ضرب عرض البحر يصبر على مهاوله



ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ


{ الأصحاب }



يقول طاوعني ولا تجيب سيره
ابنصحك يا عل في الامر خيره



طوف علشان اتعدل امورك
وجامل خصوصا فالامور الكبيره



وسولف مع هذا وهذا وهذا
وحتى اللي مايفهم بشي استشيره



رفع لخلق الله وضبط معاهم
الدنيا حرب اختار دورك وصيره



اما تكون سلاح والناس هذي
ذخيرتك والا تكون الذخيره



ونافق شفيها ياخي لما تنافق
لا اول ذنوبك ولاهي الاخيره



واكذب يا عمي اصلا الكذب متعه
يكفيك من شره ويعطيك خيره



واذا بلاك الله بقول الصراحه
قول الصراحه فالامور الصغيره



ازعجتنا بالصح والحق والصدق
الصدق ما ودى هل الصدق ديره



وخلص كلامه صاحبي وانا ساكت
ومن عقب ذاك اليوم صاحبت غيره



ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ





آاسف على الأطاله..


ودمتم بحفظ المولـى



أخووووووكم ولد النووور سلوووم/[/b]